Lo Conse à Obernai

A l’occasion de l’inauguration du marché de Noël d’Obernai, samedi 25 novembre 2017, Marc Vuillemot maire de La Seyne-sur-Mer a prononcé le discours suivant :

Monsur lo Conse,

Dònas e Monsurs lei Sosmagers e Conselhers municipaus,

Monsur lo Capolier e Dòna la Directora de l’ofici de torisma,

Cars amics alsacians e provençaus,

Es una bèla granda jòia pèr La Sanha que fuguesse chausida pèr faire la convidada d’onor de vòstre mercat de Nòuvé.

E qué mercat ! D’unei que l’i a và dison qu’es un d’aquelei mai importants d’Alsaça, emai de França. Èspèri que sarem dihnes d’aquest’onor e de la fisança que fasetz a nòstra ciutat varesa.

Segur qu’aquò es pas vengut de rèn. Fan detz ans qu’es nascuda una vertadièra amistat entre lo vòstre païs Bruche-Mossig-Piémont e la comuna de La Sanha, tràs l’afreiramènt dei comerçants e mesteiraus que lo Valentin Erhart, son capolier, fach viure mai que bèn, ambé « L’Alsace sur Mer » que vèn cada an au nòstre nos meravilhar quauquei jorns a la debuta de novèmbre.

E siam nautrei, ara, qu’anem assajat de vos portar encò d’aquì, a-n-Obernai, un pauc, un peçug, de nòstrei tradicions culturalas e patrimonialas, de cants, de vestidas, de dansatge, de la Provença maritima. E assajarèm tambèn de donar a descubrir ai vesitaires çò qu’es nòstre relarg d’uei, au segle XXI, tràs d’uneis de sei produchs artistics e mesteiraus a consumir, e d’ofertas de destinacien toristica. N’en dìsi pas mai que l’i auriá plus res-mai a destapar.

Vòli gramacejar fòrça arderosamènt tot’aquelei qu’an travalhat despiei de mès emai de mès — e que van travalhar sieis setmanas aquì— a-n-aquèla tant bèla iniciativa que l’avetz dicha « una cigala dins un sap » : tot’aquestes òmes e frumas d’aici, coma tot’aquestei de nòstre miegjorn e nòstra comuna, que siegon partenàris publics, associatius, culturaus, patrimoniaus, artistics, vò economics e toristics. Tras que vertadieramènt, gramacì en totei !